Монгол Улс хоёрхон том хөрштэй хиллэдэг геополитикийн өвөрмөц байршилтай билээ. Гэхдээ умард, өмнөд хөршүүд төдийгүй өрнө, дорно зүгтээ хоёр бүс нутгийн хүрээлэлд оршдогоо мөн мартаж болгүй. Учир нь бидний аюулгүй оршин байж, хөгжихөд эдгээр бүс нутгийн зүгээс үзүүлэх эерэг, сөрөг нөлөө багагүй юм. Тиймээс бид Зүүн хойд Ази болон Төв Азийн бүс нутгийг сайтар таньж мэдэх шаардлагатай болоод байна. Ялангуяа өрнө зүгт, баруун хилийн маань цаахнатай, бараг л хил залган орших Казахстан тэргүүтэй таван "стан"-аас бүрдэх Төв Азийн талаарх мэдлэг бидэнд зайшгүй чухал бөгөөд, бүс нутгийн судалгааг цаашид бүхий л салбар , чиглэлээр хөгжүүлэхэд анхаарах ёстой хэмээн санана. Энэ чиглэлд эрдэмтэн, судлаачид маань анхаарал хандуулж, бүс нутгийн нөхцөл байдал, геополитикийн орчныг ялгаатай олон өнцгөөс, өөрсдийн байр сууринас харж, тодорхойлон бичихээр ийнхүү зорьсон.