Тэнгэрт тэмүүлж, тэндээ мөнхөрсөн идэрмэг шонхорт зориулсан номон суварга -- Унасан газар, угаасан ус, ураг удам -- Эрхэт тэнгэрийн мандлаас шүхрээр буухыг эмээлт мориноосоо дөрөө мултлахын дайтай санаж л явсан даа... -- Монгол тамирчны чансааг дэлхийн дэвжээ үнэлэх айсуй цагийн түүчээ тогоруу -- Агаар, шүхрийн спортыг арми, онцгойгоос бүх ард түмний спорт болгох их үйл хэргийн төлөө -- Сутай, Цамбагарав, Отгонтэнгэр, Альпын нуруу, Мон Блан, Эверест...тив, дэлхийн дээвэрт мөрөө гаргаж, тугаа өргөв -- Монголын хөх тэнгэрт нисэх, агаарын спортын шинэ төрөл ар араасаа дэвэн дэвсээр ирэв -- Миний эхлэл аав ээж, та хоёрынхоо үргэлжлэл нь бидэн...

Монгол Улсын Хөдөлмөрийн баатар, гавьяат тамирчин, Олимпын мөнгөн медальт тамирчин О.Гүндэгмаа төрсөн өдрөөрөө аавынхаа спортын замналын тухай “Хүн шувуу” баримтат кино, дурсамж ном бүтээжээ.
Түүний аав Д.Отряд агаарын спортын зууны манлай тамирчин, Олон улсын хэмжээний мастер цолтой хүн байсан юм.

Монголд хамгийн олон буюу 3820 удаа шүхрээр амжилттай газардсан амжилтыг нь өдгөө ч эвдээгүй байгаа юм. Амьдралынхаа сүүлийн мөчийг хүртэл шүхрийн спортоор хичээллэж, 21 аймагт шүхрийн спортыг дэлгэрүүлэх, улсын баяр наадмаар шүхрээр буух үзүүлбэрийг анх санаачилж байжээ.
Д.Отряд 1987 онд Сутай хайрханы /4130 м/ оргилд АН2 онгоцноос 4900 метрийн өндрөөс шүхрээр буусан нь дэлхийд хоёрт, Азидаа анхдагч болсон амжилт ажээ.
О.Гүндэгмаа аавынхаа эр зоригийн тухай дурсамж баримтат кино, номыг олны хүртээл болгохыг эртнээс бэлтгэж түүхийн ховор архивын цуглуулгаас дээжлэн дэлгэцийн бүтээл болгож чаджээ. Мөн аавтайгаа хамт мөр зэрэгцэн агаарын болон шүхэр, уулын спортоор хичээллэж байсан найз нөхөд, хамт олных нь түүхэн фото агшин, дурсамж яриаг багтаасан байна.

Энэ номонд нисэх спортод зүрх сэтгэл, зүтгэл бүтээл, амь амьдралаа зориулсан Монголын шүхрийн спортын амжилт бүхний анхдагч шүхрийн спортын олон улсын хэмжээний мастер Дагвын Отрядын тухай өгүүлжээ